ان قلت سولف يسولف لي بتسبيلـة
.......... وان قلت بالله يقسـم لـي بسلهامـة
يا ويل حـيٍّ تولّـع فيـه يـا ويلـه
.......... كم من شهر مرّ لا صامـه ولا قامـه
حيٍّ يشوفه وشاف الرمش يومي لـه
.......... ادخل على الله كيف تشيلـه عظامـه؟
من ناعس الطرف ذبّاح العرب غِيلـة
.......... كم واحدٍ صافـح المـوت اوّل ايّامـه
خلّى بياضه بياضي عبد عـزّي لـه
.......... بسْ ما عليّه حـلاة الخـدّ بالشامـة
طفلٍ وتـوّه صغيـر السـنّ ياحليلـه
.......... يا ميْت! يا ميْت! مـن يلقـاه قدّامـه
توّّّّه يسالم على الترويض باقـي لـه
.......... في عالـم الحـبّ زرفالـه ودرهامـة
يمكن بعـد ليلتيـن ويمكـن الليلـة
.......... بـسّ آتأكّد!واشوفـه شـقّ هندامـه
يا وش يهمّه وانا ما نيب مـن جيلـه
.......... من عام الاوّل وهو ريمٍ وانـا رامـة
حياة من لا عشق شرواه,وش هي له؟
.......... لا وا خسارة ياْ ليـلٍ مـرّ مـا نامـه
عليـه كفّـي يحَفـر القبـر ويهيلـه
.......... واخالط الناس بـسّ عْقـال وعمامـه
لو بيـن مـزّة وتعميـرة وتعسيلـة
.......... يا وين انا والورَق والنرْد والدامـة؟
سيد العذارى يوصّي لي واوصّي لـه
.......... وقبلي خواله عليه توصّـي اعمامـه
وان ذبت انا فيه قبلـي ذاب منديلـه
.......... ولو ذاب حتّى عليه الثوب من لامـه؟
ومن يفتتن به ترى مااحدٍ يراعي لـه
.......... فتنة هل السبت من قامه ومن هامـه
مفتون في طفل توّه ما لِبَـس شيلـة
.......... اجل وشَ يْصير بي لو كمّل اعوامـه؟
الخميس مارس 27, 2008 10:03 pm